السنة التحضيرية مسار صحي جامعة الملك سعود ( بداية مشوار كليّة الطب )

بعد ما نزل التخصيص ولله الحمد  أخذ مني الوضع كثير من الوقت عشان أكتب لكم هالتدوينة بعد رواق , وبعد ما تشافيت من السنة التحضيرية تماماً عشان تأخذون رأي موضوعي عن الموضوع من غير ما تتسلل مشاعر المظلومية لحماسكم

بعد أكثر من شهر من الإستشفاء النفسي ,

 حابة أدوّن لكم تجربتي مع تحضيري 438 صحي سعود آملة إنها تفيدكم وتجهّزكم وتدخلكم واثقين ومستعدين بإذن الله.

هذي التدوينة راح تناقش كل الأسئلة اللي كانت ببالي قبل أدخل الجامعة : كم المقاعد ؟ من وين أدرس ؟ أقدر أجيب خمسة ؟ وين راح أدرس أصلاً ! وإلخ ……. من التساؤلات .

مقدمة :

السنة التحضيرية هي سنة المفترض تجهزكم لباقي سنواتكم الجامعية وتكون خطوة توصلكم بالحياة الجامعية .

طبيعي تحسّون بالضياع واختلاف الجوّ العام تماماً ! بهذا المكان راح تجتمعون بصفوة الطلاب والطالبات من جميع مناطق المملكة , لاحظت طالبات كانوا يحسون بالغباء !  لأنها فقدت إحساس التميّز أو تحس إن مستواها تراجع

بينما حقيقة , كل اللي فرق هو المحيط اللي حوالينها , إذا كنت من أفضل 10% من طلاب مدرستك , فتأكد كل اللي هنا هم من  أفضل 5% من طلاب المنطقة .. المنافسة مش سهلة ولكن لا تخلون إحساسكم هذا يخليكم أنانيين تجاه زمائكم وزميلاتكم , لولا تعاون دفعتنا هالسنة كان ما عدّينا بهذا الشكل المشرّف , نرجع لموضوعنا السنة الأولى المشتركة “ التحضيري “ 

تتكون من ترمين أو مستويين

كل مستوى فيه مجموعة من المواد الدراسية راح نناقشها بالتفصيل بإذن الله .

التقديم والقبول والمقابلة :

التقديم راح يتم عن طريق بوابة القبول الموحد للبنين والبنات ,حتى اللي من برا الرياض راح تطلع لهم الجامعة

وبعد نهاية الموعد تبع الفرز راح تطلع لكم النتائج وتجيكم رسالة قبول من الجامعة وتحديد موعد للمقابلة

ومبروك إنضمامكم للعيلة

يوم المقابلة الشخصية : طبعاً أنا من الناس اللي ماجاهم بالمسج وش مطلوب من مستندات لذلك لا تعتمدون عليه ! غشيت من صديقاتي اللي انقبلو معاي

القبول طبعاً بالمسار الصحي للسعوديين فقط وأبناء السعوديات , راح أتكلم عن وثائق السعوديين لأن أبناء السعوديات يحتاجون يجيبون شغلات أكثر من شهادة الميلاد وغيرها فتأكدو

السعوديين راح تحتاجين شهادة الثنوي والسجل الأكاديمي والهوية الوطنية فقط , لكن حلو تجيبين معاك سي في بسيط تشغلينهم فيه عنك لأن المقابلة عبارة عن إستفزاز للأسف

يوم المقابلة الشخصية : خليكم مروقين غالباً ما فيه أحد ينرفض من المقابلة الشخصيّة إلا إذا كان مغصوب لذلك خليكم إييييزي ولا راح يسألونكم أشياء عن التخصص أبداً ما تحتاجون معلومات 😊

راح يكون مرفق بالمسج مكان انعقاد المقابلة وهي المدينة الجامعية للطالبات كلية الطب وموعد المقابلة

( ممكن يتغير ) خليكم على الموعد لأنهم دقيقين جداً وإذا جيتي مبكر ممكن يدخلونك لكن غالباً راح تدخلين بوقتك

راح يتأكدون من أوراقك برا ويدخلونك قاعة تنتظرين فيها بعدين راح يجمعونكم سوا اللي بنفس الوقت ويجلسونكم تعبون نموذج ( لا تسلكون للنموذج لأنه بيكون لبّ الأشياء اللي بيناقشونكم فيها ) النموذج بيكون فيه رغباتك وتقييمك لمستواك ( رفعو لأنفسكم )  وبعض الآراء الشخصية بعدين يدخلونكم بالدور على لجان المقابلة الشخصية

عن نفسي كنت جايبة معاي سي في وهذا شيء مفيد جداً لأنك راح تشغلينهم عنك المقابلة قائمة على الإستفزااااااااز فخليك مستعدة وتراه مو شيء شخصي فيك

طبعاً بالمقابلة بيشوفون اتزانك وثقتك بنفسك وإطلاعك على الأخبار , على وقتنا كانت بداية الأزمة مع قطر وصاحبتي سألوها عن هالموضوع فخليكم على إطلاع بسيط

بالنسبة لي لأني كنت مجهزة نفسي وعندي كلام كثير أقوله فما خليت لهم مجال يستقعدون لي صراحة وهذا الأفضل واللي أنصحكم فيه

طبعاً كالعادة المقابلة لا تخلو من سؤال ما تخافين ما تتزوجين ؟ وش رأي أهلك ؟ لو كان ولدك تعبان وعندك حالة طوارئ بالمستشفى وش تسوين ؟ وأشياء قمة بالإستفزاز ولا كأنك بدولة مدنيّة والمفترض تعدّينا هالخرافات من زمان

عموماً راح يسألونك عن رغبتك الأولى وليش تبغين كذا ويبدون يحجرون لك على هالأساس لكن لا تخافون ما يردون أحد  

التخصيص والمقاعد :

أكثر سؤال كنا مدوشين نفسنا فيه كدفعة الترم الاول كامل خصوصاً إن كان فيه إشاعات إن المقاعد تخفضت ومن هذا القبيل ..

مقاعد البنات 100 مقعد ومقاعد الأولاد 200 مقعد (ظلماً وعدواناً )

لكن العدد الفعلي يكاد يلامس ال 350 مقعد بسبب النسب المتكررة ( يعني يتكرر على آخر نسبة للقبول أكثر من طالب/ة فياخذونهم كلهم

التخصيص يكون 50% مركبة الثنوي و 50% معدلك الجامعي التراكمي للسنة التحضيرية

بالنسبة لنسب التخصيص فهي تختلف من دفعة لدفعة وغالباً تزيد , إلا هذي السنة سنة كبيسة نزلت عند الأولاد نص بالمية بينما إرتفعت عند البنات

لذلك حقيقي النسب مش معيار , لكن إذا حاط ببالك تخصص معين يفضل تشيّك نسب دفعتنا وتشوف فرصك وهل ممكن تدخله أو لا, لأن عندكم الحرس خيار ممتاز للي مركباتهم مش جداً قوية وما يقدرون يضمنون نفسهم فيها

إختبار تحديد المستوى : إختبار تحديد المستوى حيكون أون لاين والإمتحان من جد تافه مره وسهل ومش معقد ولا فيه كتابة كله خيارات

ولو صار معاك مشكلة فيه دعم فني وراح يساعدونك

طبعاً حل اللي تعرفه ولا تحاول تغش لأن هالشيء ما راح يفيدك أبداً , حلو إنك تستفيد من برنامج اللغة الإنجليزية بالجامعة.

راح يقسمونكم لثلاث ليفلات :A,B,C

 وليفل C هو  أعلى مستوى, راح أناقش موضوع الليفلز بالتفصيل تحت مادة الإنجل .

أول يوم جامعي  إصدار بطاقات جامعية وكتب :

بالنسبة لي كنت مضيعة الجامعة ولا أدري وين أروح ولا من أي باب أدخل وبغيت أدخل على جامعة الرجال ومصايب😗🙆

لذلك بخليكم تستفيدون من تجربتي

البنات راح تروحون عليشة مو الدرعية ولما توصلون إشارة الجامعة روحو يسار لأن المبنى اللي عاليمين مخصص للأولاد الإنتقالي , مساكين نافيينهم عندنا

عموماً راح تدخلون من بوابة العلمي رقم 5 ومن هناك راح تلقون كل شيء واضح وسهل إن شاء الله

راح يقسمونكم قروبين , قروب يحضر محاضرة وقروب يبدأ بالإجراءات وراح تكون واضحة وفيه إرشادات عالأرض وبكل مكان أحد يعلمكم وين تروحون

وبعدين يتم التبديل ( عن نفسي سحبت على المحاضرة )

نصيحة 1 : لا تجين بشنطة صغيرة وخليك مستعدة للكتب !

نصيحة 2 : إشعار القبول مهمممم خليه معااك ما  يدخلونك بدونه وخلي الأحوال برضو معاك

نصيحة 3 : لا تثقين بالمبلغ اللي بالرسالة لأن كتب ليفل سي أقل من باقي المستويات ومافيه صرف فبتتوهقين

جيبي معاك عشرات .

أول يوم جامعي :

راح تداومون كالتالي

البنات بعليشة مبنى 25 ( المبنى هذا كان صدمة عمري لكن راح تحبونه ) بوابة 4

والأولاد مبنى التحضيري العلمي 

Common First Year - King Saud University

King Saud University, Riyadh 12373

011 469 4066

https://goo.gl/maps/iawrj1sSqkH2

ما راح تلبسون سكرب, اللبس الرسمي للأولاد ثوب والبنات تنورة سودا( مبنى 25 مهجور ولا فيه أمن لذلك خليكم أول كم إسبوع عادي بعدين لو تلبسون بنطلونات محد درا عنكم )

لا تسحبون على الدوام أول يوم ! مهم مهم جداً وراح تتعرفون فيه على دكاترة المواد وأتوقع إننا درسنا إنقلش من أول يوم بعد

ونسيت أقولكم شغلة مهمة للبنات , لا تثقون بالجدول اللي ينزل لكم عالموقع !

لأن جامعة عليشة تقفل 3 والجدول راح تلقون فيه لين 5 و 4

فلذلك راح يصير فيه تقديم لكل المحاضرات وراح يعلمونكم التفاصيل بأول يوم لكن إنتِ خليك جاية مبكر !

المواد والخطّة الدراسية :

طبعاً حنا أول دفعة تتطبق عليها الخطة الجديدة وصار فيه تغيير وحذف ودمج مواد ( شالو الريض )

                                الترم الأول

 راح تدرسون

 لغة إنجليزية إنجل ووزنها 6 ساعات

إحصاء حيوي إحص  ووزنه 3 ساعات

مهارات جامعية ووزنها 3 ساعات

IT مهارات الحاسب ووزنه 3 ساعات

ثقافة ولياقة صحية ووزنها ساعة .

اللغة الإنجليزية  إنجل 109 :

اللغة الإنجليزية حصل عليها تغيير

سابقاً كان وزنها 8 ساعات وليفل سي فقط هم اللي عندهم أوف

والباقين يدرسونها 5 أيام بالأسبوع

لكن بالخطة الجديدة نقصت عدد ساعاتها وبالتالي نقصت عدد الساعات الفعليّة فصارو ليفل سي يدرسون ساعة وخمس وأربعين دقيقه 3 أيام بالإسبوع فقط ليفل بي و اي مش متأكدة لكن الظاهر 4 ساعات لليفل اي وليفل بي 3 بينهم بريك 10 دقايق .

وكل الليفلات عندهم أوف عموماً ما عدا A, وبعض شعب ليفل سي المحظوظة كان عندهم أوفين بالأسبوع .

عموماً الكلام هذا ما راح تستفيدون منه سوى إنه مافيه داعي أبداً تغشون بإمتحان تحديد المستوى عشان الأوف, كلكم فيه
أوف عندكم إن شاء الله

وممكن وسهل جداً تعملون upgrade لو حسيتو إن مستواكم أعلى من كذا والمنهج سخيف

ممكن تسوون دروب لإمتحان الفاينل الترم الاول لما تجيبون آيلتس للجامعة 5 فما فوق و 4.5 لكل قسم.

صراحة أنا مش متأكدة من عدد كتب ليفل بي واي  اللي اعرفه انها 5 كتب وبسولا كيف طريقة تبديل الكتب حقتهم فبتكلم عن ليفل سي

راح يكون معاكم 3 كتب ,

(English for medicine ) نفس الكتاب لترمين فلا ترمونه لما تخلصون الترم الأول

Listening and speaking 4

Reading and writing 4

راح تتنقلون بينها وتقسيم الدرجات بإذن الله راح يكون واضح لكم وإحرصو على lms لأنها درجات هديّة صراحة

والإنقلش أثقل مادة بالمعدل فلا تتهاونون فيها !

فيه نقطة أبغى أقولها هنا عن إمتحانات قسم الإنقلش 

الإمتحانات غالباً تكون تقيس مستواك وليس مذاكرتك وفيه سالفة صارت إن بنت اشتكت على grammar rule  مش موجودة بالفايلز حقت كل الليفلز ولا الكتب

وقالولها مو لازم , لذلك اشتغلو على لغتكم كويييييييس بالصيف

ما يحتاج تصير بلبل لكن كلما إشتغلت على نفسك كل ما صار الموضوع أسهل عليك بعدين , وعن نفسي أشوف مناهج التحضيري ممتازة جداً والمدرسين والمدرسات على قدر عالي من الحرفيّة لذلك راح تتطور لغتك مهما كان مستواك من السنة هذي كثييير خصوصاً إن كل المواد إنقلش ما عدا النهج والفجب 😊

مرجع المذاكرة :

الجامعة هذي السنة سوت فينا مقلب 

بالعادة الإمتحان ما يطلع من الفايل لكن بفاينل الترم الأول ( اللي سويت له دروب حمدالله ) كل الميديكال فوكاب جاهم من برا الفايل وكثيييير بنات شاطرين نزلو قريد إنجل لهالسبب

لذلك ذاكرو كتاب الميدسن كامل كل الكلمات اللي أخذتوها

طبعاً الإمتحان كل الفوكاب اللي فيه ميديكال فقط , ماراح يجيكم جينيرال

وانا بالنسبة لي نصيحة لكل طالب لغته كويسة يكفيك تذاكر الكلمات فقط مع مراجعة بسيطة للأزمنة الأساسية

لا تحوسون نفسكم وتذاكرون كل القرامر رول اللي بالفايل أبداً إعتمد على حدسك واللي سماعياً يطلع معاك صحيح بالقرامر أكثر من حفظ القواعد .

والترم الثاني راح تدرسون نفس الشيء لكن سموها لغة إنجليزية تخصصية عبط 😊

إحصاء حيوي 109  إحص :

الإحصاااء مادة الA+

أسهل مادة علمية بالترم الأكاديمي كااااامل , مادة عسل والله المرجع هي ملزمة الشيحة الصامدة وبالنسبة لدفعتنا فويسات سناء وأضمن لكم ال A+

وتمرنو كثييييييييييييير من التجيمعات قبل الإمتحان.

مهارات جامعيّة نهج 109

مادة الصراحة مالها داعي أبداً , إلا جزئية البحث

ذاكرو الكتاب كوييييس ولا تهملون شيء ولا تثقون بتخطيط دكتورتكم لأنها ما تكتب الأسئلة

تجي موحدة من قسم البنين, دكتورتنا مرة قالت لنا لا تذاكرون الإثراء اللي عالهوامش وجا منه سؤال ولا أحد عوضنا

وإحرصو على هذي المادة مرررة لأن وزنها زي الكيمياء والأحياء والإحصاء حرام تنزلون فيها قريد

الحاسب : مادة سهلة جداً وبسيطة إحفظو الكتاب كويس وركزو عالكويزات نهاية كل درس وما عليكم إلا العافية 

لياقة وثقافة صحيّة :

مادة قد تكون الأبثر بشكل منقطع النظير , برضو مرجعكم الكتاب ولا تفرطون بالقريد مع إن وزنها تافه بالمعدل 0.01 بالتراكمي 😊

  

 الترم الثاني

الترم الثاني يبدأ فيه الجدّ والشدّة وتصفية الطلّاب 

راح تدرسون فيه 4 مواد : 

لغة إنجليزية تخصصية 109 إنجل ووزنها 6 ساعات

كيمياء 109 كيم ( معمل ونظري) ووزنها 3 ساعات

فيزياء 109 فيز ( معمل ونظري) ووزنها 3 ساعات

أحياء 109 حين ( معمل ونظري) ووزنها 3 ساعات

فيزياء :

تقسيم الدرجات : 60 نظري و 40 معمل

أكثر مادة خوّفتني بالسمستر ولكن  حمدالله عدت بشكل لطيييف الفيزياء أكثر منهج كان مصدر مذاكرته أزمة بالنسبة للدفعة لأن مع تغيير المناهج منسق المادة سوا منهج 109 من مرجع سيء والدكاترة ما حبوه وشافوه ضعيف فما وفروا لنا المرجع بمكتبة الجامعة ولا لقيناه بأي مكان بالمملكة ولكن أحد الطلاب اشتراه من برا وصوره للطلاب PDF

بالنسبة لي برضو طلبته من مكتبة من برا المملكة , في طلاب ذاكرو المرجع كامل وفيه طلاب اعتمدو السلايدز وفيه طلاب ذاكرو السلايدز وملازم الخصوصي والمرجع والوضع كان متعب وتحسين إنك مو مؤمنة نفسك

عن نفسي من اليوم الأول عرفت إني أحتاج خصوصي عشان المرجع والشرح فدخلت فيزياء مع الدكتور حنفي وبالنسبة لي كان ممتاز وأخذت أوراقه مصدر مذاكره نهائي مع البروبلمز

البروبلمز جداً جداً مهمة جا منها في الميد والفاينل نسخ لصق مغيرين بس الأرقام

ميزة الدكتور حنفي انه يحذف كل اللي يشوفه مو ضروري وفعلاً ما يجي أبداً منه بالإمتحان, يعطيك قوانين بديلة وطرق حل أسهل وأسرع

وبرضو كلاساته قصيرة كلاسين بالأسبوع كل واحد ساعة ونص فقط والأوراق قليلة وخلصة ومركزة

لكن مش كل أحد يدخل عند حنفي يضمن الأي بلص زي د.أماني لأنه من النوع اللي ما يعيد ويزيد ولا يحط مسائل عادي قانون ما عليه ولا تطبيق

يبي طالب مخه نظيييف ومركز لذلك اللي يحس نفسه ما يقدر يعتمد على ذكاءه بهالأمور يزيد تمارين كثير على حنفي وبالنسبة لي مصدر ممتاز جداً وملخّص للمذاكرة .

بالنسبة للعملي لطيف وسهل وبإذن الله درجات مضمونة لكن مشكلته بالفاينل تنسين التجارب وبعطيكم نصيحة تمنيييييت من قلبي إني سويتها من بداية السنة كانت بتكون مذاكرة العملي بالفاينل أسهل بكثيير

ألا وهي بعد كل تجربة تعملونها صوروا فيديو للتجربة بشكل وافي ماياخذ منكم خمس دقايق وصورو الخطوات بالتفصيل لأنكم بمعامل المراجعة ما راح يمديكم تراجعون كل شيء وتتذكرونه.

الكيمياء:

تقسيم الدرجات 60 نطري و 40 معمل

بالنسبة لي الكيمياء هي كانت مادة التصفية الحقيقية لأن الفيزياء الكل يخاف منه ويعطيه أكبر من حجمه ويهمل الكيمياء والكيمياء تحتاج جلَد وتركيز ومراجعة لأنها كلها تعتمد على بعض بالنسبة لي مرجع مذاكرة الكيمياء كان ملازم د.أماني ودخلت عندها من بداية السنة كلاسات, دكتورة أماني رائعة وتشرح بذمة وضمير وكنت أسلم لملازمها 100% ولا أفتح السلايدز أبداً لأن السلايدز مره مختصر وممكن تهملين معلوم محطوطة بآخر السلايد لأن شكلها مو مهم لكن د.أماني تشرحها ب 4 صفحات من أهميتها , أماني ما تحذف أبداً وخبرة بالمنهج وتكّي كثير عالنقاط المهمة واللي بتجي بالإمتحان وتقولكم عليها , مدري كيف كنت بعدي مقرر الكيمياء من غير شرحها للأمانة لأن دكتورتي كانت مغربية وشرحها سيء ولا كنت أفهم عليها بالمرّة .. وتأزمت كثير أول كلاس عندها وحسيت حظي سيء وإني ماتوفقت بدكتورات هالترم لا فيزياء ولا كيمياء بس لما دخلت مع أماني إرتحت كثيير وجبت درجات ممتازة وحظرت معها كلاسات العملي برضو .

المعمل : بالنسبة لنا هذي أول سنة لمقرر 109 يصير فيه معمل كيمياء لذلك الوضع كان لخبطة بالنسبة للبناء جلسنا شهر بدون معمل لأنهم كانو يبنون المعامل بعليشة ويجهزونها المنهج خفيف ولطيف والفاينل والميدات كانت عبارة عن درجات هدية لكن سمعت إن الأولاد كانت سيستمهم أصعب مننا شوي والفاينل حقهم غير ما أبي اكتب لكم تفاصيل ممكن تخوفكم ولا تنفعكم لكن معمل الكيمياء بالنسبة لي كان ممتع ودرجات مضمونة.

الأحياء :

هذي المادة هي السلسبيل اللي بيشفي غليلكم من هالترم .. مادة جميييييييلة ودرجاتها فوق المضمونة ولا تحتاجون فيها حوسة مصادر ولا تلفون يمين ولا يسار .. فقط السلاااايدز درستني الكوردنيتور د.داليا وكانت أجمل أجمل مايكون ومحاضراتها رائعة أنصحكم تسجلون لها للي يدرسون عندها وتداولوا التسجيلات وراح أحاول أنزل تسجيلات دفعتنا لكم لأنها تختصر الموضوع وتعطيكم الزبدة وتفهّمكم بأبسط الطرق .. طبعا الأحياء كنظري ومعمل من أمتع المقررات اللي أخذتها بحياتي لذلك أبداً لا تشيلون همها وأهم نقطة ذاكروا التجميعات لأن 40% من الأسئلة تتكرر نصاً .

المعمل : طبعاً أول ما أقول معمل الأحياء بيجي ببالكم التشريح

نعم راح تشرحون الترم هذا جرذان وفئران .. الموضوع ممكن يكون ثقيل شوي لكن صدقوني أول ما تمسكون المشرط وتجربون راح تحسون بمتعة فضيييعة

بالنسبة لمعمل الأحياء البنات راح يرسمون الأولاد ما عندهم رسم وبالنسبة للبنات بقول معلومات مهمة

تصوير المجاهر على دفعتنا قالو ممنوع وشددو مرة عالموضوع  لكن البنات صوروا بالخش والدس وصراحة ساعدونا بهالموضوع لذلك حاولو تصورون أنتم بعد لأن مذاكرة الشرايح بدون صور صعبة مرة

وبالنسبة للرسم مهم مهم جداً ترسمون بدقة وتكتبون كل البيانات مع دكتورة المعمل حقتكم لأن كل معمل يختلف عن الثاني بالبيانات وكل محضّرة معمل تختار البيانات اللي هي تبيها لذلك لا تستسخفون الموضوع حرام تضيع درجاتكم على رسمة . وبالنسبة للفاينلز كانو يغششون مرة لذلك لا تخافون

اللغة الإنجليزية: نفس الترم الأول تماماً ولكن فرق المسمى .

المراجع :

بالنسبة لمراجع المذاكرة لازم يمر عليكم أول شهر بالترم الثاني وأنتم مختبصيييييين ولا تدرون تذاكرون من وين ولا أي مرجع يناسبكم عن نفسي رحت المكتبة وشريت كل ملازم الخصوصي وتصفحتها ودخلت خصوصي بالمادتين( فيز وكيم) لين عرفت وش يصلح لي كمرجع ووش اللي استثنيته نهائياً ولازم تسوون كذا وتجربون بنفسكم

لكن راح أكتب لكم قائمة بالمراجع الجيدة واللي كانت مفيدة لنا هالترم .

الكيمياء : ملازم أماني فالمرتبة الأولى طبعاً , سلايدات د. الصبيحي من الأولاد , ملزمة الكناني وملزمة حسين سليمان .
بالنسبة لي ذاكرت ملازم أماني فقط وحتى السلايدز ما فتحتها لأنها ملخبطة ومخبصة وملخصة جداً

الفيزياء : المراجع كانت شحيحة بالفيزياء 

الأفضل بالنسبة لي كان حنفي والبروبلمز ولا ذاكرت غيرهم أبد ( حتى السلايدز) لكن اللي كان متداول بين الطالبات والطلاب

هو : مذكرة هشام والضياء والمرجع.

الأحياء والإحصاء : السلايدز ولا تطلعون عنها    

ولكن للإحصاء هذي فويسات د.سناء , كثير أعرفهم جابو ال A+ بعد الله بسببها مع إنهم كانو متأزمين ودكاترتهم سيئين 
https://www.dropbox.com/sh/emvpuxsosf67fsp/AABf-3mjPi2t717vIO0rXrEla?dl=0

وملخصات نشمية برضو مرة مرة رهيبة, عن نفسي كنت أستغني عن الملزمة ساعات وأعتمد على تلخيص نشمية

https://drive.google.com/file/d/0By9O2TmUVqN9bDhuZVNEN3B3ZWs/view
https://drive.google.com/file/d/0By9O2TmUVqN9U2hWa280ZV83LU0/view
https://drive.google.com/file/d/0By9O2TmUVqN9R292UmdtUGJ4bE0/edit

للأسف ما لقيت الملخصات كاملة حاولو تاخذونها من طالباتها لأنها تعطيها إياهم كل سنة وبرضو ملزمة الفيفي للتدريب كانت كويسة

والحمدالله إنتهت هالسنة بحلوها ومرّها بتخصص الرغبة الاولى : الطب البشري 💗💗 

الله يحقق لكم رغباتكم ويوفقكم , أتمنى إنه كان مفيد ولو بنسبه بسيطة وأعطاكم فكرة عامة عن الموضوع.